Հայաստանում այսօր 13 768 բուժքույր կա. med.news.am

Հայաստանի Հանրապետությունում 2013 թվականի տվյալներով 13 768 բուժքույր կա, իսկ միջին բուժանձնակազմի աշխատակիցների ընդհանուր թիվը կազմում է 18 426։ Այս մասին NEWS.am Medicine-ի թղթակցին ասաց Առողջապահության համակարգի գործունեության  գնահատման և կադրային ռեսուրսների ծառայության ղեկավար Դիանա Անդրեասյանը։

Տարեկան Հայաստանում մոտ 1000 բուժքույր է ավարտում պետական միջին մասնագիտական բժշկական հաստատությունները։ Առողջապահության նախարարության տվյալներով՝ 2012 թվականին ապագա բուժքույրերի թիվը կազմել է 1075, իսկ ամենամեծ թվով շրջանավարտներ վերջին հինգ տարիների ընթացքում ունեցել ենք 2010 թվականին՝ 1516 հոգի։

Ինչպես լրագրողներին պատմել էր ԱՆ արտահիվանդանոցային բժշկական օգնության քաղաքականության բաժնի պետ Ռուզաննա Յուզբաշյանը, շտապօգնության ծառայությունն այսօր ունի 363 բուժքույր, որոնց միջին տարիքը 47 է եւ որոնք հատուկ վերապատրաստում են անցել՝ շտապօգնությունում աշխատելու համար:

Ինչ վերաբերվում է բուժքույրերի աշխատավարձերին, մեր տեղեկություններով, բազային աշխատավարձը պետական հաստատություններում կազմում է 45 000-60 000 դրամ; հնարավոր են նաեւ բոնուսներ՝ հերթապահությունների եւ վիրահատությունների դիմաց։

Շտապօգնության ծառայությունում աշխատող բուժքույրերի աշխատավարձերը, ինչպես լրագրողներին պատմել էին Առողջապահության նախարարության աշխատակիցները, ավելի բարձր են եւ կազմում են մոտ 85 000-91 000 դրամ։

Հիշեցնենք, որ այսօր՝ մայիսի 12-ին, Բուժքույրերի միջազգային օրն է։

Հարցեր, պատասխաններ, մեկնաբանություններ